ചെറിയ പെരുന്നാള്‍ ദിനത്തിലും പരീക്ഷ; പ്ലസ്ടു സി.ബി.എസ്.ഇ പരീക്ഷ മാറ്റണമെന്ന ആവശ്യം ശക്തം
തിരുവനന്തപുരം: ചെറിയ പെരുന്നാള്‍ ദിനത്തിലും വിദ്യാര്‍ഥികള്‍ക്ക് പരീക്ഷ. പത്താം ക്ലാസ്, പ്ലസ്ടു സി.ബി.എസ്.ഇ പരീക്ഷകളാണ് ചെറിയ പെരുന്നാള്‍ ദിവസം നടക്കുന്നത്. പത്താംക്ലാസ് ഹോം സയന്‍സ് പരീക്ഷയും പ്ലസ്ടു ഹിന്ദി മെയിന്‍, ഹിന്ദി ഇലക്ടീവ് കോഴ്‌സിന്റേയും പരീക്ഷകളാണ് മെയ് രണ്ടിന് നിശ്ചയിച്ചിരിക്കുന്നത്. അറബിക് കലണ്ടര്‍ പ്രകാരം മെയ് രണ്ടിന് ചെറിയ പെരുന്നാളാവാന്‍ സാധ്യതയുളളതിനാല്‍ വിദ്യാര്‍ഥികള്‍ക്കിടയില്‍ ആശങ്കയുണ്ട്.
കൊവിഡിനെ തുടര്‍ന്ന് സി.ബി.എസ്.ഇ പരീക്ഷകള്‍ രണ്ടു ഘട്ടങ്ങളിലായാണ് നടത്തുന്നത്. ഈ വര്‍ഷത്തെ ഒന്നാംഘട്ട പരീക്ഷ അവസാനിച്ചു. രണ്ടാം ഘട്ടമാണ് ഇപ്പോള്‍ നടക്കുന്നത്.
മെയ് ഒന്നിന് ശവ്വാല്‍ മാസപ്പിറവി കാണുകയാണെങ്കില്‍ രണ്ടിനായിരിക്കും ചെറിയ പെരുന്നാള്‍, അല്ലെങ്കില്‍ മെയ് മൂന്നിനായിരിക്കും പെരുന്നാള്‍. ഇക്കാര്യത്തില്‍ പരീക്ഷ ബോര്‍ഡും വിദ്യാര്‍ഥികളും ആശയക്കുഴപ്പത്തിലാണ്. ഇങ്ങനെ സംഭവിച്ചാല്‍ പെരുന്നാള്‍ ദിനത്തിലും വിദ്യാര്‍ഥികള്‍ പരീക്ഷാ ഹാളില്‍ ഇരിക്കേണ്ടി വരും. ഏപ്രില്‍ 26ന് ആരംഭിച്ച സി.ബി.എസ്.ഇ പ്ലസ്ടു പരീക്ഷ ജൂണ്‍ 15നാണ് അവസാനിക്കുക.
ഒരു അഭിപ്രായം പോസ്റ്റ് ചെയ്യൂ
0 അഭിപ്രായങ്ങള്‍