വിദ്യാർഥിനികളോട് മോശമായി പെരുമാറിയെന്ന് ആരോപണം; സ്വകാര്യ ആശുപത്രിയിലെ ഡോക്ടറെ മർദിച്ചു

കോഴിക്കോട്: ന​ഗരത്തിലെ സ്വകാര്യ ആശുപത്രിയിൽ ഡോക്ടർക്ക് മർദ്ദനമേറ്റു. ആശുപത്രിയിൽ എത്തിയ ഒരു സംഘം വിദ്യാർഥികളാണ് ഡോക്ടറെ മർദ്ദിച്ചത്. വ്യാഴാഴ്ച രാവിലെ അടിയന്തരചികിത്സാവിഭാ​ഗത്തിൽ പനിക്ക് ചികിത്സ തേടിയെത്തിയ വിദ്യാർഥിനികളോട് മോശമായി പെരുമാറി എന്നാരോപിച്ചായിരുന്നു മർദ്ദനം..

വെള്ളിയാഴ്ച ഉച്ചയോടെയാണ് ആശുപത്രിയിൽ എത്തിയ വിദ്യാർഥിസംഘം ഡോക്ടറെ കാഷ്വാലിറ്റിയിൽ നിന്ന് വലിച്ച് പുറത്തിറക്കി അടിച്ചത് .

എന്നാൽ ഇന്നലെ വിദ്യാർഥിനികൾ ചികിത്സ കഴിഞ്ഞ് അധ്യാപകനോടൊപ്പം മടങ്ങിയതാണെന്നും പരാതി ഒന്നും പറഞ്ഞിരുന്നില്ലെന്നും ആശുപത്രി അധികൃതർ പറഞ്ഞു. പരിശോധനാസമയത്ത് ഹോസ്പിറ്റലിലെ വനിതാ ജീവനക്കാർ അടുത്തുണ്ടായിരുന്നുതായും ആശുപത്രി അധികൃതർ അറിയിച്ചു.

സ്വകാര്യ സ്ഥാപനത്തിലെ വിദ്യാർഥികളാണ് ഡോക്ടറെ മർദ്ദിച്ചത്. എന്നാൽ സംഭവത്തെക്കുറിച്ച് പ്രതികരിക്കാൻ സ്ഥാപനത്തിന്റെ അധികൃതരോ വിദ്യാർഥികളോ തയ്യാറായില്ല. പരിക്കേറ്റ ഡോക്ടർ കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്. സംഭവത്തിൽ ഡോക്ടറും ഐ.എം.എയും നടക്കാവ് പോലീസ് സ്റ്റേഷനിൽ പരാതി നൽകി. അപമര്യാദയായി പെരുമാറിയെന്ന് കാണിച്ച് ഡോക്ടർക്കെതിരെ വിദ്യാർത്ഥിനികളും പരാതി നൽകിയിട്ടുണ്ട്.