മുടി വെട്ടി വരണമെന്ന് ടീച്ചർ, മൊട്ടയടിച്ചെത്തി കുട്ടി; ചോദിച്ചപ്പോൾ പ്രിൻസിപ്പലിന് മർദനം

മലയാറ്റൂർ: സ്കൂൾ പ്രിൻസിപ്പലിന് വിദ്യാർഥിയുടെ മർദനം. പരിക്കേറ്റ പ്രധാനാധ്യാപകനെ അങ്കമാലിയിൽ ആശുപത്രിയിൽ പ്രവേശിപ്പിച്ചു. പ്ളസ് ടു വിദ്യാർഥിയാണ് മർദിച്ചത്. ഒരാഴ്ച മുൻപ് മുടി നന്നായി വെട്ടി വൃത്തിയായി സ്കൂളിൽ വരണമെന്ന് ക്ലാസ് അധ്യാപിക വിദ്യാർഥിയോട് ആവശ്യപ്പെട്ടിരുന്നു.

വെള്ളിയാഴ്ച രാവിലെ തല മുണ്ഡനം ചെയ്താണ് വിദ്യാർഥി വന്നത്. അധ്യാപിക പ്രിൻസിപ്പലിനെ കണ്ടുവരാൻ പറഞ്ഞയച്ചു. പ്രിൻസിപ്പൽ കാര്യങ്ങൾ ചോദിക്കുന്നതിനിടെ വിദ്യാർഥി കഴുത്തിനു പിടിച്ച് ഞെക്കുകയും മുഖത്തിടിക്കുകയും ചെയ്തു. ശേഷം ഇറങ്ങിയോടിയ വിദ്യാർഥിയെ അധ്യാപകരും നാട്ടുകാരും ചേർന്ന് തിരികെ സ്കൂളിലെത്തിച്ചു. വിദ്യാർഥി വീണ്ടും അധ്യാപകനോട് വെല്ലുവിളി ഭാവത്തിൽ സംസാരിച്ചു. നാട്ടുകാർ അറിയിച്ചതിനെത്തുടർന്ന് കാലടി പോലീസെത്തി വിദ്യാർഥിയുടെ മാതാപിതാക്കളെ വിളിപ്പിച്ചു.

മർദനമേറ്റ പ്രധാനാധ്യാപകൻ പരാതി നൽകിയിട്ടില്ല. വിദ്യാർഥിക്ക് പ്രായപൂർത്തിയാകാത്തതിനാൽ കേസെടുത്തിട്ടുമില്ല. അധ്യാപകന്റെ പരാതി ലഭിച്ചാൽ നിയമ നടപടികൾ സ്വീകരിക്കുമെന്ന് കാലടി പോലീസ് പറഞ്ഞു.