കേരളത്തില്‍ മഴ കനക്കും...

കേരളത്തില്‍ ഈ ആഴ്ച മഴ കനക്കും. ഇന്നു  അഞ്ചു ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു. മലപ്പുറം , കോഴിക്കോട്, വയനാട്, കണ്ണൂര്‍ കാസര്‍കോട് ജില്ലകളില്‍ അതിശക്തമായ മഴക്ക് സാധ്യതയുണ്ട്.  ഏഴുജില്ലകളില്‍ യെല്ലോ അലര്‍ട്ട് നല്‍കിയിട്ടുണ്ട്. പത്തനംതിട്ട ആലപ്പുഴ, കോട്ടയം , എറണാകുളം ഇടുക്കി തൃശൂര്‍ പാലക്കാട് ജില്ലകളിലാണ് യെലോ അലര്‍ട്ടുള്ളത്.   വെള്ളിയാഴ്ച വരെ കേരളം, കര്‍ണ്ണാടകം, ലക്ഷദ്വീപ് തീരങ്ങളില്‍ നിന്ന് മത്സ്യ തൊഴിലാളികള്‍ കടലില്‍ പോകരുതെന്ന മുന്നറിയിപ്പും കാലാവസ്ഥാ വകുപ്പ് നല്‍കിയിട്ടുണ്ട്. 

 മണിക്കൂറില്‍ 50 കിലോ മീറ്റര്‍ വരെ വേഗതയുള്ള കാറ്റിന് ഇടയുണ്ട്. കടല്‍ പ്രക്ഷുബ്ധവുമാണ്. അതിനാലാണ് മത്സ്യ തൊഴിലാളികളും തീരപ്രദേശത്ത് താമസിക്കുന്നവരും ശ്രദ്ധിക്കണമെന്ന മുന്നറിയിപ്പ് നല്‍കിയിരിക്കുന്നത്. ഇടിമിന്നല്‍ ജാഗ്രതാ നിര്‍ദേശവും നിലവിലുണ്ട്. 

24 ാം തീയതിവരെ മിക്കവാറും എല്ലാ ജില്ലകളിലും മഴ കിട്ടും. 27 ന് കാലവര്‍ഷം കേരളത്തിലെത്തുമെന്നാണ് കരുതുന്നത്, എന്നാല്‍ ഇത് നാലു ദിവം മുന്‍പോ പിന്‍പോ ആകാം.  കേരളത്തിലും ലക്ഷദ്വീപിലും കര്‍ണാടകത്തിലും മണ്‍സൂണിന് മുന്‍പായുള്ള മഴയാണ് ശക്തമായിരിക്കുന്നത്. വടക്കുകിഴക്കന്‍ സംസ്ഥാനങ്ങളിലും മഴ ലഭിക്കുന്നുണ്ട്. 

22ാം തീയതിയോടെ കര്‍ണാടക തീരത്തിനടുത്തായി ന്യൂനമര്‍ദം രൂപമെടുക്കുമെന്നാണ് കാലാവസ്ഥാ വകുപ്പ് പറയുന്നത്. ഇതോടെ കേരളത്തില്‍ മഴ കൂടുതല്‍ ശക്തമായേക്കാം. ജാഗ്രതപാലിക്കണമെന്ന നിര്‍ദേശം കാലാവസ്ഥാ വകുപ്പ് സര്‍ക്കാരിന് കൈമാറിയിട്ടുണ്ട്.  നാളെ ( 20.5.25) നാലുജില്ലകളില്‍ ഓറഞ്ച് അലര്‍ട്ടാണ് ( കോഴിക്കോട്, വയനാട്, കണ്ണൂര്‍, കാസര്‍കോട്). എട്ടുജില്ലകളില്‍ യെലോ അലര്‍ട്ട്– (പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍, പാലക്കാട്, മലപ്പുറം).