വിജയത്തേക്കാൾ നമ്മെ പാഠങ്ങൾ പഠിപ്പിക്കുന്നത് പരാജയങ്ങളാണ്.

✍️   അഡ്വ - ടി.പി.എ.നസീർ

മനുഷ്യനെ ആഴത്തിൽ പഠിക്കാനും ജീവിതത്തിൽ കൂടുതൽ ശ്രദ്ധാലുവാക്കാനും സഹായിക്കും ! ചില പരാജയങ്ങൾ മനഷ്യ നെ വിനയാന്വിതനാക്കി മാറ്റുന്നു.പരാജയം ഒരാളിൽ മാറ്റങ്ങൾ അനിവാര്യമാക്കുകയും പുതിയ അവസരങ്ങൾക്ക് വഴി തുറക്കുകയുമാണ് ചെയ്യുന്നത്. എസ്.എസ്.എൽ.സി പരീക്ഷയിലെ  ഉന്നത വിജയം കാണുമ്പോഴുള്ള സന്തോഷത്തേക്കാൾ എന്നെ അലോസരപ്പെടുത്തുന്നത് തോറ്റു പോയ കുറച്ചു പേരെയോർത്താണ്! 

അവരുടെ മാനസികാവസ്ഥ, ഒറ്റപ്പെടൽ, കുറ്റപ്പെടുത്തലുകൾ, ഞാൻ ഒന്നിനും പറ്റാത്തവനാണെന്ന തോന്നൽ, ജീവിതം ഇനി എങ്ങിനെയാണ് മുന്നോട്ട് പോവുക? വരാനുള്ള ജീവിതത്തിൽ പരാജയങ്ങൾ മാത്രമായിരിക്കുമോ  എന്നോടൊപ്പമുണ്ടാവുക? ഇനി ഇങ്ങിനെ ജീവിക്കുന്നതിനേക്കാൾ മരണമല്ലേ അഭികാമ്യം? ഇത്തരത്തിൽ എന്തൊക്കെ ചിന്തകളായിരിക്കും അവരുടെ മനസ്സുകളിലിപ്പോഴുണ്ടാവുക? ഇത്തരമൊരവസരത്തിൽ കുട്ടികളെ അവരുടെ പരാജയനുഭവത്തെ വിജയത്തിൻ്റെ ഭാവി ഊർജ്ജമാക്കി മാറ്റാൻ അവരെ പരിശീലിപ്പിക്കുകയും കൂട്ടിപ്പിടിക്കുകയും ചെയ്യേണ്ടതുണ്ട്. സ്കൂളുകളിൽ നൂറുമേനി പോയതിൻ്റെ പാപഭാരം തോറ്റു പോയ കുട്ടികളുടെ മേൽ അടിച്ചേൽപ്പിക്കാതെ അവരെ നെഞ്ചോട് ചേർത്തുവെക്കുകയാണ് മാനേജ്മെൻറ് ചെയ്യേണ്ടത്! അവരുടെ വീടുകളിൽ പ്രതീക്ഷയുടെ വെളിച്ചമായി അദ്ധ്യാപകർ ചെന്നെത്തണം. 

വിജയിക്കുമ്പോൾ മറ്റുള്ളവർ നമ്മെയറിയുമെങ്കിലും ഒരാൾ പരാജയപ്പെടുമ്പോഴാണ് അയാൾ അയാളെ തന്നെ തിരിച്ചറിയാൻ തുടങ്ങുന്നത്. ഇത്തരത്തിലുള്ള ആത്മ നീരീക്ഷണങ്ങളും തിരിച്ചറിവുകളും നമ്മെ ഒടുവിൽ വിജയത്തിലേക്കാണ്  കൊണ്ടെത്തിക്കുക.