കട്ടിപ്പാറ ചമലില് തെരുവില് കഴിഞ്ഞിരുന്ന വയോധികനെ ഉദയം ഹോമിലേക്ക് മാറ്റി
കട്ടിപ്പാറ: ചമല് അങ്ങാടി പരിസരത്തും ബസ്സ് സ്റ്റോപ്പിലുമായി കഴിഞ്ഞിരുന്ന ചമല് പൂവന്മല കണ്ണന്കീരനെ സാമൂഹ്യ നീതി വകുപ്പിന്റെ ഉദയം ഹോമിലേക്ക് മാറ്റി. ബന്ധുക്കള് ഉണ്ടെങ്കിലും കാഴ്ച നഷ്ടപ്പെട്ട കണ്ണന് കീരന് തെരുവില് കഴിയുന്നത് ശ്രദ്ധയില് പെട്ടതിനെ തുടര്ന്ന് വാര്ഡ് മെമ്പര് അനില് ജോര്ജ്, സാമൂഹ്യ പ്രവര്ത്തകരായ പി എം രാജേഷ്, പി സി ഷമീര്, പി ടി മുജീബ് റഹ്മാന്, സി കെ മുഹമ്മദ്, പി വി അബ്ദുല് ഗഫൂര് എന്നിവരുടെ നേതൃത്വത്തില് ബന്ധുക്കളെ നേരില് കണ്ടുസംസാരിച്ചെങ്കിലും നിവൃത്തി കേടുകൊണ്ടു കൂട്ടികൊണ്ടു പോകുവാന് ആരും തയ്യാറായിരുന്നില്ല. തുടര്ന്ന് താമരശ്ശേരി പോലീസ് ഇന്സ്പെക്ടര്, ഗ്രാമപഞ്ചായത്ത് പ്രസിഡണ്ട്, സെക്രട്ടറി, ജില്ലാ സാമൂഹ്യ നീതി ഓഫിസര് എന്നിവര്ക്ക് നല്കിയ പരാതിയുടെ അടിസ്ഥാനത്തില് ചില സന്നദ്ധ സംഘടനകള് ഇയാളെ സംരക്ഷിക്കാന് തെയ്യാറായി വന്നെങ്കിലും തിരിച്ചറിയല് രേഖകള് ഇല്ലാത്തതിനാല് സന്നദ്ധ സംഘടനകള് പിന്വാങ്ങുകയായിരുന്നു.
സാമൂഹ്യ നീതി വകുപ്പ് മന്ത്രി ആര് ബിന്ദുവിന്റെ നേരിട്ടുള്ള ഇടപെടലിനെ തുടര്ന്ന് ജില്ലാ സാമൂഹ്യ നീതി ഓഫിസര് അടിയന്തിരമായി പ്രശ്നത്തില് ഇടപെടുകയും ആവശ്യമായ വൈദ്യസഹായം നല്കിയ ശേഷം തെരുവില് കഴിയുന്നവര്ക്കായി കോഴിക്കോട് മങ്കാവില് പ്രവര്ത്തിക്കുന്ന ഉദയം ഹോമിലേക്ക് മാറ്റുകയും ചെയ്തു. മികച്ച കയ്യേല പണിക്കാരനായിരുന്ന കണ്ണന്കീരന് 1982-83 കാലയളവില് ചമല് പൂവന്മലയില് നിന്നും അമ്പായതോട് മിച്ചഭൂമിയിലേക്കും പിന്നീട് മറ്റ് പലയിടങ്ങളിലും മാറി മാറി താമസിച്ച് കറങ്ങി തിരിഞ്ഞ് വീണ്ടും നാട്ടില് എത്തിചേരുകയുമായിരുന്നു. ചെറിയ ജോലികള് ചെയ്ത് പ്രദേശവാസികളുടെ സഹായത്തോടെ ജീവിക്കുന്നതിനിടെ ഇരു കണ്ണുകളുടേയും കാഴ്ച നഷ്ടപ്പെടുകയായിരുന്നു. ഇതേ തുടര്ന്ന് നാട്ടുകാര് പരിചരിക്കുകയും അവശ്യ വസ്തുക്കള് വാങ്ങി നല്കി ഉദയം കോഡിനേറ്റര്ക്ക് കൈമാറുകയുമായിരുന്നു.
ഒരു അഭിപ്രായം പോസ്റ്റ് ചെയ്യൂ
0 അഭിപ്രായങ്ങള്