ഡ്രൈവിങ്​ ലൈസൻസ്​ കാലാവധി രണ്ടുമാസം നീട്ടി; വാഹന രേഖകൾക്കും ഇളവ്​

തിരുവനന്തപുരം: ഡ്രൈവിങ് ലൈസന്‍സ്, വാഹന റജിസ്ട്രേഷന്‍ സര്‍ട്ടിഫിക്കറ്റ്, ഫിറ്റ്നസ് സര്‍ട്ടിഫിക്കറ്റ്, പെര്‍മിറ്റ് തുടങ്ങിയ രേഖകളുടെ കാലാവധി കേന്ദ്ര ഉപരിതല ഗതാഗതവകുപ്പ് 2021 നവംബര്‍ 30 വരെ നീട്ടി. 1988-ലെ കേന്ദ്ര മോട്ടോര്‍ വാഹന നിയമം, 1989-ലെ കേന്ദ്ര മോട്ടോര്‍ വാഹന ചട്ടങ്ങള്‍ എന്നിവ പ്രകാരമുള്ള സര്‍ട്ടിഫിക്കറ്റുകളുടെ കാലാവധിയാണ് ദീര്‍ഘിപ്പിച്ചതെന്ന്​ സംസ്​ഥാന ഗതാഗത മന്ത്രി ആന്‍റണി രാജു അറിയിച്ചു. ഈ കാലയളവിനുള്ളില്‍ത്തന്നെ വാഹന ഉടമകള്‍ രേഖകള്‍ പുതുക്കണമെന്നും മന്ത്രി പറഞ്ഞു.

കോവിഡ് മൂലം നേരത്തെ ഇവയുടെ കാലാവധി സെപ്റ്റംബര്‍ 30 വരെ നീട്ടിയിരുന്നു. ഇത്​ ഇന്ന്​ അവസാനിക്കുന്നതിനിടെയാണ്​ വീണ്ടും നീട്ടി നൽകിയത്​.

ഫിറ്റ്നസ് സര്‍ട്ടിഫിക്കറ്റുകളുടെ കാലാവധി അവസാനിക്കുന്നതിനാല്‍ വാഹനങ്ങള്‍ നിരത്തിലിറക്കാന്‍ സാധിക്കാത്തതും കോവിഡ് പ്രതിസന്ധി നിലനില്‍ക്കുന്നതും പരിഗണിച്ച്​ കാലാവധി നീട്ടണമെന്ന് ആവശ്യപ്പെട്ട് കേന്ദ്ര മന്ത്രി നിതിന്‍ ഗഡ്കരിക്ക്​ സംസ്ഥാനം കത്ത് നല്‍കിയിരുന്നുവെന്നും മന്ത്രി പറഞ്ഞു..