കട്ടിപ്പാറ പഞ്ചായത്തില് ഉള്പ്പെട്ട അമ്പോക്ക് പ്രദേശവാസികള് യാത്രാ സൗകര്യമില്ലാത്തതിനാല് ദുരിതത്തില്
താമരശ്ശേരി: കട്ടിപ്പാറ പഞ്ചായത്തില് ഉള്പ്പെട്ട അമ്പോക്ക് പ്രദേശവാസികള് യാത്രാ സൗകര്യമില്ലാത്തതിനാല് ദുരിതത്തില്. നിരവധി കുടുംബങ്ങള് തിങ്ങി താമസിക്കുന്ന പ്രദേശത്തേക്ക് വാഹനം എത്താത്തതിനാല് രോഗികളെ ആശുപത്രിയില് എത്തിക്കാന് പോലും പ്രയാസപ്പെടുകയാണ്. ആശുപത്രിയില് പോവാന് വാഹനം ലഭിക്കാത്തതിനാല് പ്രദേശത്തെ കോഴിഫാമില് ജോലിചെയ്യുന്ന ഉത്തര്പ്രദേശ് സ്വദേശി ഷഹജിലിന്റെ ഭാര്യ ഗുലിസ്ത കഴിഞ്ഞ ദിവസം ഫാമിലെ ഷെഡില് ആണ്കുഞ്ഞിന് ജന്മം നല്കിയിരുന്നു. പ്രസവ വേദനയെ തുടര്ന്ന് ആശുപത്രിയില് പോവാന് വാഹനം അന്വേഷിച്ചെങ്കിലും ഇവിടേക്ക് വരാന് ആരും തയ്യാറായില്ല. സമീപവാസിയായ നസീമ ഓടിയെത്തി പരിചരണം നല്കിയതിനാലാണ് അമ്മയുടേയും കുഞ്ഞിന്റെയും ജീവന് രക്ഷിക്കാനായത്. ഒരു മണിക്കൂറോളം യുവതി വേദന സഹിച്ച് കിടന്നു. ശേഷം താമരശ്ശേരി താലൂക്കാശുപത്രിയില് നിന്ന് കനിവ് 108 ആംബുലന്സ് എത്തിയെങ്കിലും റോഡിന്റെ ശോചനീയാവസ്ഥ കാരണം ഏറെ ദൂരത്ത് നിര്ത്തിയിടുകയായിരുന്നു. നാട്ടുകാര് നിര്ബന്ധിച്ചതിനെ തുടര്ന്നാണ് ആമ്പുലന്സ് തകര്ന്ന റോഡിലേക്കിറക്കി അമ്മയേയും കുഞ്ഞിനേയും ആശുപത്രിയില് എത്തിച്ചത്. നിരവധി പേര് ഇത്തരത്തില് ചികിത്സ ലഭിക്കാതെ പ്രയാസപ്പെട്ടിട്ടുണ്ടെന്നും ഇനിയെങ്കിലും അധികൃതര് കണ്ണ് തുറക്കണമെന്നുമാണ് നാട്ടുകാര് ആവശ്യപ്പെടുന്നത്.
ഒരു അഭിപ്രായം പോസ്റ്റ് ചെയ്യൂ
0 അഭിപ്രായങ്ങള്