കോഴിക്കോട് മെഡിക്കൽ കോളജിൽ നവജാത ശിശുവിനെ ഉപേക്ഷിച്ച സംഭവം: യുവതി പത്തനംതിട്ടയിൽ പിടിയിൽ

​കോഴിക്കോട്: മെഡിക്കൽ കോളജ് ആശുപത്രിയിൽ 16 ദിവസം പ്രായമുള്ള നവജാത ശിശുവിനെ ഉപേക്ഷിച്ച് കടന്നുകളഞ്ഞ യുവതി പിടിയിൽ. പത്തനംതിട്ടയിലെ സ്വന്തം വീട്ടിൽ നിന്നാണ് പോലീസിന്റെ അന്വേഷണസംഘം ഇവരെ കണ്ടെത്തിയത്. ഗർഭിണിയാണെന്ന വിവരം വീട്ടുകാർ അറിയാതിരിക്കാനാണ് കുഞ്ഞിനെ ഉപേക്ഷിച്ചതെന്ന് യുവതി പോലീസിനോട് വെളിപ്പെടുത്തി.

​മൂന്ന് വർഷമായി ഭർത്താവുമായി വേർപിരിഞ്ഞു കഴിയുന്ന യുവതി വിദേശത്ത് ജോലി ചെയ്തുവരികയായിരുന്നു. സുഹൃത്തിൽ നിന്നാണ് ഗർഭം ധരിച്ചത്. ഗർഭവിവരം അടുത്ത സുഹൃത്തുക്കൾക്ക് മാത്രമാണ് അറിയാമായിരുന്നത്. വയനാട് സ്വദേശി എന്ന വ്യാജ വിലാസത്തിലാണ് ഈ മാസം എട്ടിന് യുവതി പ്രസവത്തിനായി കോഴിക്കോട് മെഡിക്കൽ കോളജിൽ പ്രവേശിച്ചത്.