സംസ്ഥാനത്ത് മഴക്കെടുതി രൂക്ഷം: മരണസംഖ്യ 11 ആയി
തിരുവനന്തപുരം: സംസ്ഥാനത്ത് കനത്ത മഴ തുടരുന്ന പശ്ചാത്തലത്തിൽ മഴക്കെടുതിയിൽ മരിച്ചവരുടെ എണ്ണം 11 ആയി ഉയർന്നതായി റവന്യൂ വകുപ്പ് മന്ത്രി എ.പി. അനിൽകുമാർ അറിയിച്ചു. മലപ്പുറത്ത് നാല് പേരും തിരുവനന്തപുരം, ആലപ്പുഴ, ഇടുക്കി ജില്ലകളിൽ രണ്ട് പേർ വീതവും കോഴിക്കോട്ട് ഒരാളുമാണ് മരണപ്പെട്ടത്.
സംസ്ഥാനത്തൊട്ടാകെ 30 വീടുകൾ പൂർണമായും 293 വീടുകൾ ഭാഗികമായും തകർന്നിട്ടുണ്ട്. ഇടുക്കി ജില്ലയിലാണ് ഏറ്റവും കൂടുതൽ വീടുകൾ (14 എണ്ണം) പൂർണമായി തകർന്നത്. വിവിധ ജില്ലകളിലായി തുറന്ന 273 ദുരിതാശ്വാസ ക്യാമ്പുകളിലായി 7,674 പേരെ മാറ്റിപ്പാർപ്പിച്ചു. പത്തനംതിട്ട ജില്ലയിലാണ് ഏറ്റവും കൂടുതൽ ക്യാമ്പുകൾ പ്രവർത്തിക്കുന്നത് (75 എണ്ണം).
പത്തനംതിട്ടയിൽ മിന്നൽ പ്രളയ സാധ്യത
പത്തനംതിട്ട ജില്ലയിൽ പ്രളയസാധ്യത രൂക്ഷമാണെന്നും പമ്പാ നദിയിൽ അതിതീവ്ര വെള്ളപ്പൊക്ക മുന്നറിയിപ്പ് ലഭിച്ചിട്ടുണ്ടെന്നും മന്ത്രി പി.സി. വിഷ്ണുനാഥ് വ്യക്തമാക്കി. അപകടനില നിലനിൽക്കുന്ന പ്രദേശങ്ങളിൽ നിന്ന് ആളുകളെ ഉടൻ സുരക്ഷിത സ്ഥാനങ്ങളിലേക്ക് മാറ്റുമെന്നും അദ്ദേഹം കൂട്ടിച്ചേർത്തു.
ധനസഹായം അടിയന്തരമായി നൽകും
രക്ഷാപ്രവർത്തനങ്ങളും ദുരിതാശ്വാസ പ്രവർത്തനങ്ങളും യുദ്ധകാലാടിസ്ഥാനത്തിൽ പുരോഗമിക്കുകയാണെന്ന് റവന്യൂ മന്ത്രി അറിയിച്ചു. മരണപ്പെട്ടവരുടെ കുടുംബങ്ങൾക്കുള്ള സഹായവും വീടും വസ്തുവകകളും നഷ്ടപ്പെട്ടവർക്കുള്ള അടിയന്തര ധനസഹായവും സമയബന്ധിതമായി വിതരണം ചെയ്യും. വില്ലേജ് ഓഫീസർമാരുടെ പ്രാഥമിക റിപ്പോർട്ടിന്റെ അടിസ്ഥാനത്തിൽ ആദ്യഗഡു ധനസഹായം ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് നേരിട്ട് എത്തിക്കുമെന്നും മന്ത്രി വ്യക്തമാക്കി
