തുഷാരയും കുടുംബവും ഒളിവില്; ഭര്ത്താവ് കൊലക്കേസ് പ്രതി
റെസ്റ്റോറന്റ് ആക്രമണക്കേസിലെ പ്രതികളായ തുഷാര അജിത്ത്, ഭര്ത്താവ് അജിത്ത്, സുഹൃത്ത് അപ്പു എന്നിവര് ഒളിവിലാണെന്നും ഇവര്ക്കായി അന്വേഷണം ഊര്ജിതമാക്കിയിട്ടുണ്ടെന്നും ഇന്ഫോ പാര്ക്ക് പൊലീസ്. തുഷാരയും സംഘവും ഇന്ഫോ പാര്ക്കിന് സമീപത്തെ റെസ്റ്റോറന്റില് നടത്തിയത് സംഘടിത ആക്രമണമാണെന്നും പൊലീസ് അറിയിച്ചു.
തുഷാരയുടെ ഭര്ത്താവ് അജിത്ത് കൊലക്കേസ് ഉള്പ്പെടെ നിരവധി കേസുകളിലെ പ്രതിയാണ്. ചേരാനെല്ലൂര് സ്റ്റോഷില് രജിസ്റ്റര് ചെയ്ത ഇംതിയാസ് കൊലക്കേസിലെ പ്രതിയാണ് അജിത്ത്. സുഹൃത്ത് അപ്പുവും ക്രിമിനല് കേസുകളിലെ പ്രതിയാണെന്ന് അന്വേഷണസംഘം അറിയിച്ചു.
കഴിഞ്ഞദിവസം ഇന്ഫോപാര്ക്കിന് സമീപത്താണ് സംഭവമുണ്ടായത്. ചില്സേ ഫുഡ് സ്പോട്ട് എന്ന ഫുഡ് കോര്ട്ടില് കട നടത്തുന്ന നകുല്, സുഹൃത്ത് ബിനോജ് ജോര്ജ് എന്നിവരെയാണ് തുഷാരയും സംഘവും ആക്രമിച്ചത്. ഫുഡ് കോര്ട്ടില് ബോംബേ ചാട്ട്, ബേല്പൂരി എന്നിവ വില്ക്കുന്ന നകുലിന്റെ പാനിപൂരി സ്റ്റാള് തുഷാരയും സംഘവും പൊളിച്ചുമാറ്റിയിരുന്നു. ഇത് ചോദ്യം ചെയ്ത നകുലിനെയും ബിനോജ് ജോര്ജിനെയും ഇവര് വെട്ടിപ്പരുക്കേല്പ്പിക്കുകയായിരുന്നു. വെട്ടേറ്റ ബിനോജ് ശസ്ത്രക്രിയയെ തുടര്ന്ന് ഇപ്പോഴും ആശുപത്രിയില് ചികിത്സയിലാണ്. ഫുഡ് കോര്ട്ടിലെ കടയില് തനിക്ക് അവകാശമുണ്ടെന്ന് പറഞ്ഞായിരുന്നു തുഷാര ആക്രമണം നടത്തിയത്. എന്നാല്, ഫുഡ് കോര്ട്ടിന്റെ ഉടമസ്ഥതയെയും നടത്തിപ്പിനെയും സംബന്ധിച്ച് കേസുകള് നിലവിലുണ്ടെന്നും വിശദമായ അന്വേഷണത്തിനൊടുവില് പൊലീസ് കണ്ടെത്തി.
നോണ് ഹലാല് ബോര്ഡ് വച്ചതിന് യുവാക്കള് തന്നെ ആക്രമിച്ചെന്നായിരുന്നു തുഷാര ആദ്യം സോഷ്യല്മീഡിയയിലൂടെ പ്രചരിപിച്ചത്. വിശദമായ അന്വേഷണത്തില് ഇത് വ്യാജപ്രചരണമാണെന്ന് പൊലീസ് കണ്ടെത്തിയിരുന്നു. യുവാക്കളെ വെട്ടി പരുക്കേല്പ്പിച്ച സംഭവം മറച്ചുവച്ചായിരുന്നു തുഷാരയുടെ വാദങ്ങള്. തുഷാരയുടെ വാദങ്ങള് ബിജെപി സംസ്ഥാന അധ്യക്ഷന് കെ സുരേന്ദ്രന് അടക്കമുള്ളവര് ഫേസ്ബുക്കിലൂടെ ഷെയര് ചെയ്തിരുന്നു. പിന്നാലെ, തുഷാരയ്ക്ക് നേരെ നടന്നത് ജിഹാദി ആക്രമണമാണെന്ന് ഉത്തരേന്ത്യയിലെ സംഘപരിവാര് പ്രൊഫൈലുകളും പ്രചരിപ്പിച്ചു. കേരളത്തില് ഹിന്ദുക്കള്ക്ക് സംരംഭങ്ങള് തുടങ്ങാന് തടസമാണെന്ന് തരത്തില് വ്യാപക പ്രചരണം സംഘപരിവാര് അനുകൂല മാധ്യമങ്ങളും നടത്തിയിരുന്നു.
ഒരു അഭിപ്രായം പോസ്റ്റ് ചെയ്യൂ
0 അഭിപ്രായങ്ങള്