കാല്‍മുട്ടുവേദന ഉണ്ടാകുന്നതിന് കാരണം ആര്‍ത്രൈറ്റിസ് ആണോ? പരിഹാരമെന്താണ്?

മനുഷ്യശരീരത്തിലെ എല്ലാ സന്ധികളിലും കാണപ്പെടുന്ന കട്ടി കുറഞ്ഞ മിനുസമേറിയ എല്ലിന്റെ രൂപഭേദമാണ് തരുണാസ്ഥി അഥവാ കാർട്ടിലേജ്. എല്ലുകളുടെ അഗ്രഭാഗം ഇവയാൽ മൂടപ്പെട്ടത് മൂലമാണ് സന്ധികൾ അനായാസേന ചലിപ്പിക്കുവാൻ സാധിക്കുന്നത്. സന്ധികളിൽ തരുണാസ്ഥി നഷ്ടപ്പെടുന്ന അവസ്ഥയെ ആർത്രൈറ്റിസ് എന്ന് വിളിക്കുന്നു. സന്ധികളെ ബാധിക്കുന്ന വിവിധ രോഗങ്ങൾ മൂലം ഈ അവസ്ഥ ഉണ്ടാവാം. ഓസ്റ്റിയോ ആർത്രൈറ്റിസ്, റുമറ്റോയ്ഡ് ആർത്രൈറ്റിസ് (ആമവാതം) എന്നീ വകഭേദങ്ങളാണ് കാൽമുട്ടിൽ സാധാരണയായി കണ്ടു വരുന്നത്.

ആർത്രൈറ്റിസ് പലതരം

പ്രായസംബന്ധമായ തേയ്മാനം മൂലം തരുണാസ്ഥി നഷ്ടപ്പെടുന്ന അവസ്ഥയാണ് ഓസ്റ്റിയോ ആർത്രൈറ്റിസ്. സ്വന്തം പ്രതിരോധ ശേഷി തരുണാസ്ഥിയെ നശിപ്പിക്കുന്ന റുമറ്റോയ്ഡ് ആർത്രൈറ്റിസ് (ആമവാതം) മറ്റൊരു ഉദാഹരണമാണ്. രക്തത്തിൽ യൂറിക് ആസിഡിന്റെ ഉയർന്ന അളവ്, അണുബാധ തുടങ്ങി മറ്റ് പല കാരണങ്ങൾ കൊണ്ടും ആർത്രൈറ്റിസ് ഉണ്ടാവാം. ഉയർന്ന ശരീരഭാരം കാൽമുട്ടിലെ തേയ്മാനത്തിന്റെ വേഗത കൂട്ടുന്നു. മുട്ടിനു സമീപത്തെ പേശികളുടെ ബലക്കുറവ്, മുട്ടിന് സംഭവിക്കുന്ന പരിക്കുകൾ ശരിയായ രീതിയിൽ ചികിത്സിക്കപ്പെടാതെ പോകുന്നത് എന്നിവ തേയ്മാനത്തിന്റെ വേഗത കൂടുവാൻ കാരണമാകാറുണ്ട്.

രോഗനിർണ്ണയം

ആർത്രൈറ്റിസ് പല തരത്തിലുണ്ട് എന്നതിനാൽ ശരിയായ കാരണം കണ്ടെത്തിയ ശേഷം അതിനനുസരിച്ചുള്ള ചികിത്സ വേണം നൽകാൻ. ഡോക്ടർ നേരിട്ട് നടത്തുന്ന പരിശോധനകൾ കൂടാതെ എക്സ് റേ, രക്ത പരിശോധന എന്നിവ രോഗവസ്ഥ കണ്ടെത്താൻ സഹായിക്കുന്നു. തരുണാസ്ഥി നഷ്ടപ്പെടാനുള്ള കാരണം മുട്ടിനുള്ളിലെ അണുബാധ, ട്യൂമർ, പരിക്ക് എന്നിവയല്ല എന്ന് പ്രാഥമികമായി ഉറപ്പ് വരുത്തണം. ഇവയ്ക്കൊക്കെ അടിയന്തിരമായി ചികിത്സ തേടേണ്ടതുണ്ട്.

ശസ്ത്രക്രിയ ഒഴിവാക്കാം

പ്രാരംഭ ഘട്ടത്തിൽ തന്നെ ചികിത്സിച്ചാൽ കഠിനമായ പ്രശ്നങ്ങളും ശസ്ത്രക്രിയയും ഒഴിവാക്കാം. റുമറ്റോയ്ഡ് പോലെയുള്ള വാത രോഗങ്ങൾ തുടക്കത്തിലെ കണ്ടു പിടിക്കുകയാണെങ്കിൽ മരുന്നുകളിലൂടെ തേയ്മാനം നിയന്ത്രിക്കാനാകും. ദീർഘനാൾ ചികിത്സ ആവശ്യമുള്ള ഈ അസുഖങ്ങൾക്ക് കൃത്യമായ ഇടവേളയിലുള്ള രക്തപരിശോധനകളുടെ അടിസ്ഥാനത്തിൽ മരുന്നുകളുടെ അളവ് നിയന്ത്രിക്കുകയും വേണം. ഓസ്റ്റിയോ ആർത്രൈറ്റിസ് പൊതുവെ വർധക്യത്തിലാണ് അനുഭവപ്പെടുന്നത്. എങ്കിലും 40 വയസ്സ് മുതൽ അതിന്റെ ലക്ഷണങ്ങൾ കണ്ടു തുടങ്ങാം. ഡോക്ടർ നിർദേശിക്കുന്ന പ്രത്യേക വ്യായാമങ്ങളിലൂടെ മുട്ടിനു ചുറ്റുമുള്ള പേശികളുടെ ബലം കൂട്ടുന്നത് തേയ്മാനത്തിന്റെ വേഗത കുറയ്ക്കുവാൻ സഹായിക്കും. ശരീരഭാരം കുറയ്ക്കുന്നതും പ്രയോജനപ്രദമാണ്.

തയ്യാറാക്കിയത്:

ഡോ. ഉണ്ണിക്കുട്ടൻ ഡി.

ഓർത്തോപീഡിക് സർജൻ

എസ്.യു.ടി. ഹോസ്പിറ്റൽ, പട്ടം