മർദനത്തിനു പ്രതികാരം,4 വർഷത്തിനോശേഷം ബൈക്ക് യാത്രികനെ വെട്ടിവീഴ്ത്തിയ പ്രതി പിടിയിൽ

കോഴിക്കോട് : നാലു വർഷം മുമ്പ് നടന്ന അക്രമത്തിൽ  പ്രതികാരമായി യുവാവിനെ വെട്ടി പരുക്കേൽപിച്ചു. കഴിഞ്ഞ ദിവസം അർധരാത്രിയിൽ ബൈക്ക് യാത്രികനെ വെട്ടിപ്പരിക്കേൽപ്പിച്ച വെള്ളയിൽ ചെക്രിയാൻ വളപ്പിൽ ഫൈജാസ് എന്ന ഹംസത്തലി (36) യെയാണ് വെള്ളയിൽ പോലീസ് അറസ്റ്റ് ചെയ്തത്. കഴിഞ്ഞ ദിവസം വെസ്റ്റ്ഹിൽ പൂഴിയിൽ റോഡ് ജംഗ്ഷനിൽ വെച്ചായിരുന്നു ആക്രമണം. പുതിയ കടവ് സ്വദേശി അബ്ദുൾ നൗഫലിനെയാണ് വെട്ടിയത്. കൈയ്ക്കും കാലിനും പുറത്തും പരിക്കേറ്റ നൗഫൽ മെഡിക്കൽ കോളേജ് ആശുപത്രിയിൽ ചികിത്സയിലാണ്. നാലു വർഷം മുമ്പ് നടന്ന സംഘർഷത്തിൻ്റെ പ്രതികാരമായാണ് കഴിഞ്ഞ ദിവസത്തെ ആക്രമണമെന്ന് പോലീസ് പറഞ്ഞു.

വെള്ളയിൽ റോഡിൽ ഗതാഗതക്കുരുക്ക് ഉണ്ടായതുമായി ബന്ധപ്പെട്ടാണ് 2017 ൽ നൗഫലും ഫൈജാസും തമ്മിൽ അടിപിടി നടന്നിരുന്നു.  ഇതുമായി ബന്ധപ്പെട്ട പരാതിയിൽ വെള്ളയിൽ പോലീസ് സ്‌റ്റേഷനിൽ കേസ് നിലവിലുണ്ട്. ഇതിൻ്റെ തുടർച്ചയായാണ് കഴിഞ്ഞ ദിവസം നൗഫൽ ആക്രമിക്കപ്പെട്ടത്. ഇയാളെ പിന്തുടർന്ന ഫൈജാസ് പൂഴിയിൽ ജംഗ്ഷനിലെ ദോബി ഖാന ഭാഗത്തു വെച്ച് വെട്ടിവീഴ്ത്തുകയായിരുന്നു. സംഭവം പ്രദേശവാസികളിലൊരാൾ കണ്ടതോടെ പ്രതി രക്ഷപ്പെട്ടു.

പുറത്തും കാലിലും കൈയിലും ആഴത്തിലുള്ള മുറിവുകളേറ്റ നിലയിലായിരുന്ന നൗഫലിനെ പോലീസെത്തിയാണ് ആശുപത്രിയിലേക്ക് മാറ്റിയത്. തുടർന്ന് സംഭവത്തിൽ കേസെടുക്കുകയും മെഡിക്കൽ കോളേജ് പരിസരത്തുവെച്ച് പ്രതിയെ പിടികൂടുകയുമായിരുന്നു.