ദേശീയ വിദ്യാഭ്യാസ ദിനം (ഇന്ത്യ)

നവംബർ 11 ഇന്ത്യ ദേശീയ വിദ്യാഭ്യാസ ദിനം ആയി ആചരിക്കുന്നു. സ്വതന്ത്ര ഇന്ത്യയിലെ പ്രഥമ വിദ്യാഭ്യാസമന്ത്രിയായിരുന്ന അബുൽ കലാം ആസാദിന്റെ ജന്മദിവസമാണ് ദേശീയ വിദ്യാഭ്യാസ ദിനമായി കൊണ്ടാടുന്നത്. വിദ്യാഭ്യാസരംഗത്ത് ഇന്ത്യയിൽ ഇന്നു കാണുന്ന എല്ലാ മുന്നേറ്റങ്ങൾക്കും തുടക്കംകുറിച്ചവരിൽ പ്രധാനിയായിരുന്നു മൗലാനാ അബുൾകലാം ആസാദ്. 1888 നവംബർ 11-ന് മക്കയിൽ ജനിച്ച മൗലാനാ അബുൾ കലാം ആസാദ് തുടങ്ങിവെച്ച വിദ്യാഭ്യാസ പരിഷ്‌കാരങ്ങളോടുള്ള ആദരസൂചകമായാണ് ഭാരതം ഈ ദിവസം ദേശീയ വിദ്യാഭ്യാസ ദിനമായി ആഘോഷിക്കുന്നത്.

2008 മുതല്‍ നവംബര്‍ 11 വിദ്യാഭ്യാസ ദിനമായി ആചരിക്കുന്നു. വിദ്യാഭ്യാസം, ദേശീയ വികസനം, സ്ഥാപന വികസനം എന്നീ മേഖലകളില്‍ അബുള്‍ കലാം ആസാദിന്റെ സംഭാവന വലുതായിരുന്നു. രാജ്യത്തെമ്പാടും ഈ ദിവസം പല തരത്തിലുള്ള പ്രകടനങ്ങളും പരിപാടികളുമൊക്കെ സംഘടിപ്പിക്കാറുണ്ട്. വിദ്യാഭ്യാസത്തിന്റെ പ്രാധാന്യം ജനങ്ങള്‍ക്ക് മനസ്സിലാക്കിക്കൊടുക്കുക എന്നതാണ് ഈ പരിപാടികളിലൂടെ ലക്ഷ്യമിടുന്നത്. വിദ്യാഭ്യാസത്തിലേക്ക് കൂടുതല്‍ പേര്‍ ആകര്‍ഷിക്കാന്‍ ഇത് വഴിവെക്കും.

*◆അബുള്‍ കലാം ആസാദിന്റെ സംഭാവനകള്‍*

1947 മുതല്‍ അദ്ദേഹം അന്തരിച്ച 1958 ഫെബ്രുവരി 22 വരെ ഇന്ത്യയുടെ വിദ്യാഭ്യാസ മന്ത്രിയായിരുന്നു. 11 വര്‍ഷത്തെ ഭരണത്തില്‍ അദ്ദേഹം നല്‍കിയ സംഭാവനകള്‍ ചെറുതല്ല. സാഹിത്യത്തെയും ഫൈന്‍ ആര്‍ട്‌സിനെയും പ്രോത്സാഹിപ്പിച്ചു.

അദ്ദേഹത്തിന്റെ കാലഘട്ടത്തില്‍ പ്രധാനപ്പെട്ട ചില കമ്മീഷനുകള്‍ രൂപീകരിക്കപ്പെട്ടു. യു.ജി.സി, എ.ഐ.സി.ടി.സി, ഖരക്പൂര്‍ ഇന്‍സ്റ്റിറ്റ്യൂട്ട് ഓഫ് ഹയര്‍ എജ്യൂക്കേഷന്‍, യൂണിവേഴ്‌സിറ്റി എജ്യൂക്കേഷന്‍ കമ്മീഷന്‍, സെക്കന്‍ഡറി എജ്യൂക്കേഷന്‍ കമ്മീഷന്‍ തുടങ്ങിയവ സ്ഥാപിതമായി.

സംഗീത നാടക അക്കാദമി, സാഹിത്യ അക്കാദമി, ലളിത കലാ അക്കാദമി തുടങ്ങിയവ സ്ഥാപിച്ചു.

വനിതകള്‍ക്കുള്ള വിദ്യാഭ്യാസം, 14 വയസുവരെ വിദ്യാര്‍ത്ഥികളുടെ സൗജന്യ നിര്‍ബന്ധിത വിദ്യാഭ്യാസം

ഐ.ഐ.എസ്.സി, സ്‌കൂള്‍ ഓഫ് ആര്‍ക്കിടെക്ച്ചര്‍ ആന്‍ഡ് പ്ലാനിങ്, ജാമിയ മിലിയ ഇസ്ലാമിയ, ഐ.ഐ.ടി ഖരഗ്പൂര്‍ എന്നിവ സ്ഥാപിച്ചതും മൗലാന അബുള്‍ കലാം ആസാദാണ്.

സ്വാതന്ത്ര്യ സമര സേനാനി, പത്രപ്രവര്‍ത്തകന്‍, നവോത്ഥാന നായകന്‍, എന്നാ നിലകളില്‍ അബുള്‍ കലാം ആസാദ് ചരിത്രത്താളുകളില്‍ അറിയപ്പെടുന്നു. ഇന്ന്് കാണുന്ന രാജ്യത്തെ ഐ.ഐ.ടികളും ഡല്‍ഹി സര്‍വകലാശാലയ്ക്കും പിന്നിലെ ബുദ്ധി കേന്ദ്രം അദ്ദേഹത്തിന്റേതായിരുന്നു. 1992ല്‍ രാജ്യം അദ്ദേഹത്തെ ഭാരത രത്‌നം നല്‍കി ആദരിച്ചു.