വാഹനത്തിന് സൈഡ് കൊടുക്കാത്തതിൽ തർക്കം; സിപിഐഎം പ്രാദേശിക നേതാവിന് ക്രൂരമർദനം

തിരുവനന്തപുരം പോത്തൻകോട് കാട്ടായിക്കോണത്ത് സിപിഐഎം പ്രാദേശിക നേതാവിന് ക്രൂരമർദനം. കാട്ടായിക്കോണം ബ്രാഞ്ച് സെക്രട്ടറി ഷാജിക്കാണ് അജ്ഞാതസംഘത്തിന്റെ മർദനമേറ്റത്. അതിക്രൂരമായ മർദനമേറ്റ ഷാജിയുടെ നില ​ഗുരുതരമായി തുടരുകയാണ്.

വാഹനം സൈഡ് കൊടുക്കാത്തതിനെ ചൊല്ലിയുണ്ടായ തർക്കമാണ് അക്രമത്തിന് കാരണമെന്നാണ് ലഭ്യമാകുന്ന വിവരം. ഷാജിയെ തിരുവനന്തപുരത്തെ സ്വകാര്യ ആശുപത്രിയിൽ പ്രവേശിപ്പിച്ചു. അക്രമികൾക്കായി പൊലീസ് അന്വേഷണം ആരംഭിച്ചു.

രാത്രി ഒമ്പതരയോടെയായിരുന്നു കേസിനാസ്പദമായ സംഭവം. ഷാജിയുടെ എതിരെ അമിത വേ​ഗത്തിൽ വന്ന കാർ ഷാജിയുടെ വാഹനത്തിൽ ഉരഞ്ഞു. ഇത് ചോദ്യം ചെയ്ത് പരസ്യമായി തർക്കമുണ്ടായി. ഇതിനുശേഷം അവിടെ നിന്ന് മടങ്ങുന്നതിനിടയിൽ കാറിൽ പിന്തുടർന്നെത്തിയ സംഘം ഷാജിയെ മർദിക്കുകയായിരുന്നു.