ജോലിക്കിടെ ലൈക്കിട്ട് കളിക്കണ്ട; വിജിലൻസിന്റെ ഡിസ്‌ലൈക്ക് കിട്ടും

കോഴിക്കോട്: ജോലിസമയത്ത് സാമൂഹികമാധ്യമങ്ങളിൽ വിലസി നടക്കുന്നവർക്ക് പിടിവീഴും. വാട്സാപ്പ്, ഫെയ്സ്ബുക്ക് തുടങ്ങിയവയിൽ മുഴുകി ജോലിയിൽ ശ്രദ്ധിക്കാത്തവരെ പിടികൂടാനുള്ള സംവിധാനം വിജിലൻസിന്റെ പരിഗണനയിലുണ്ട്.

ഓഫീസുകളിലും വിദ്യാലയങ്ങളിലും ജോലിയിലിരിക്കേ പലരും ഫോണിൽ കളിക്കുന്നതായി പരാതി ലഭിച്ചിരുന്നു. തുടർന്നാണ് സ്ഥിരം സംവിധാനമൊരുക്കാൻ വിജിലൻസ് തീരുമാനിച്ചത്. പൊതുജനങ്ങൾക്ക് നേരിട്ട് പരാതി നൽകാനുള്ള ഇ-മെയിൽ ഐ.ഡി.യുമുണ്ട്.

ആവശ്യക്കാർ ഓഫീസുകളിലെത്തുമ്പോൾ ഉദ്യോഗസ്ഥർ ഫോണിൽ മുഴുകിയിരിക്കുന്നതുമൂലമുള്ള പ്രയാസം ഒഴിവാക്കാനാണ് നടപടി. അടുത്തുതന്നെ ഉദ്യോഗസ്ഥർക്ക് മാർഗനിർദ്ദേശങ്ങൾ നൽകും. പോസ്റ്റുകളും ചർച്ചകളും വീണ്ടെടുത്ത് അവ പോസ്റ്റുചെയ്യുന്ന സമയം നോക്കിയാവും വിജിലൻസ് നടപടിയെടുക്കുക. ഇതിനായി ഓരോ ജില്ലയിലും ഡിവൈ.എസ്.പി. തലത്തിലുള്ള ഒരുദ്യോഗസ്ഥനെയും ചുമതലപ്പെടുത്തും.