അബ്ദുൽ സത്താറിനെ കസ്റ്റഡിയില്‍ വേണമെന്ന് എന്‍ഐഎ; സംസ്ഥാന സെക്രട്ടറി ഒളിവില്‍

തീവ്രവാദകേസില്‍ അറസ്റ്റിലായി ജയിലിൽ കഴിയുന്ന പോപ്പുലർ ഫ്രണ്ട് സംസ്ഥാന ജനറൽ സെക്രട്ടറി അബ്ദുൽ സത്താറിനെ എൻഐഎ കസ്റ്റഡിയിൽ ആവശ്യപ്പെടും. കൊച്ചി പ്രത്യേക എന്‍ഐഎ കോടതിയിൽ അന്വേഷണസംഘം ഇന്ന് കസ്റ്റഡി അപേക്ഷ നൽകും. ഏഴ്‌ ദിവസത്തേക്ക കസ്റ്റഡി ആവശ്യപ്പെടാനാണ് തീരുമാനം. കൊച്ചിയിൽ രജിസ്റ്റർ ചെയ്ത കേസില്‍ മൂന്നാം പ്രതിയാണ് അബ്ദുള്‍ സത്താർ.

രാജ്യവിരുദ്ധ പ്രവർത്തനങ്ങൾക്ക് ഗൂഢാലോചന നടത്തിയതിലും സമൂഹമാധ്യമങ്ങൾവഴി തീവ്രവാദ സംഘടനകളിലേക്ക് യുവാക്കളെ ചേർത്തതിൽ അബ്ദുൾ സത്താറിന് പങ്കുണ്ടെന്നാണ് എൻഐഎകണ്ടെത്തൽ. കേസിൽ നേരത്തെ അറസ്റ്റിലായ പതിനൊന്ന് പേരെ എൻഐഎ കസ്റ്റഡിയിൽ ചോദ്യംചെയ്തിരുന്നു. കേസിലെ പന്ത്രണ്ടാംപ്രതി പോപ്പുലർ ഫ്രണ്ട് സംസ്ഥാന സെക്രട്ടറി സി എ റൗഫ് ഇപ്പോളും ഒളിവിലാണ്