അഹമ്മദാബാദ് വിമാന ദുരന്തം: അപകടത്തിൽ പെട്ടവരിൽ മലയാളി യുവതിയും; മരണസംഖ്യ 170 ആയി

അഹമ്മദാബാദ് വിമാന ദുരന്തത്തിൽ അപകടത്തിപ്പെട്ടവരിൽ മലയാളി യുവതിയുമെന്ന് വിവരം. തിരുവല്ല പുല്ലാട് സ്വദേശിനി രഞ്ജിത ഗോപകുമാരൻ നായരാണ് വിമാനത്തിൽ ഉണ്ടായിരുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്. എന്നാൽ കുടുംബത്തിന് ഇതുവരെ ഔദ്യോഗികമായി വിവരം ലഭ്യമായിട്ടില്ല. നിലവിൽ മരണ സംഖ്യ ഉയർന്ന് 170 ആയിട്ടുണ്ട്. നിരവധി പേർ അത്യാസന്ന നിലയിൽ തുടരുകയാണ്.

അതേസമയം, വിമാന അപകടവുമായി ബന്ധപ്പെട്ട് പുറത്തുവരുന്ന വാർത്തകൾ ഞെട്ടിപ്പിക്കുന്നതും വേദനിപ്പിക്കുന്നതുമെന്ന് മന്ത്രി വി എൻ വാസവൻ പറഞ്ഞു. മലയാളികൾ ഉണ്ടോ എന്ന് ഔദ്യോഗിക വിവരം ലഭിച്ചിട്ടില്ല. കൂടുതൽ വിവരങ്ങൾ അന്വേഷിച്ചുവരികയാണ്. യുദ്ധകാല അടിസ്ഥാനത്തിൽ രക്ഷാദൗത്യം നടക്കുന്നുണ്ട്. ഡിസാസ്റ്റർ മാനേജ്മെൻറ് കൃത്യമായി പ്രവർത്തിക്കുന്നുണ്ട്. വിവരങ്ങൾ ശേഖരിക്കാൻ മുഖ്യമന്ത്രിയുടെ തലത്തിൽ നടപടികൾ ആരംഭിച്ചതായും അദ്ദേഹം പറഞ്ഞു.

90 പേര്‍ ഉള്‍പ്പെടുന്ന മൂന്ന് എന്‍ഡിആര്‍എഫ് ടീമുകൾ കൂടി ഗാന്ധിനഗറില്‍ നിന്ന് എത്തിയിട്ടുണ്ട്. വഡോദരയില്‍ നിന്ന് മൂന്ന് എന്‍ഡിആര്‍എഫ് ടീമുകളെ കൂടി പ്രദേശത്തേക്ക് അയച്ചിട്ടുണ്ട്. അടിയന്തര സേവനങ്ങള്‍ക്കും വിവരങ്ങള്‍ക്കുമായി
അഹമ്മദാബാദ് സിറ്റി പോലീസിന്‍റെ 07925620359 എന്ന എമര്‍ജന്‍സി നമ്പരിലേക്ക് ബന്ധപ്പെടാവുന്നതാണ്.