കാവിലുംപാറയിൽ കൂട്ടംതെറ്റി വീട്ടുമുറ്റത്തെത്തിയ കാട്ടാന ദമ്പതിമാരെ ആക്രമിച്ചു; രക്ഷപ്പെട്ടത് തലനാരിഴയ്ക്ക്

തൊട്ടിൽപ്പാലം: കാവിലുംപാറയിൽ കൂട്ടംതെറ്റി വീട്ടുമുറ്റത്തെത്തിയ കാട്ടാനയുടെ ആക്രമണത്തിൽ ദമ്പതിമാർക്ക് പരിക്ക്. കരിങ്ങാട് മുട്ടിച്ചിറ സ്വദേശികളായ തങ്കച്ചൻ, ഭാര്യ ആനി എന്നിവർക്കാണ് പരിക്കേറ്റത്. ഇന്നലെ വൈകീട്ടോടെയായിരുന്നു സംഭവം.

പ്രദേശത്ത് ആഴ്ചകളോളമായി ആന ഭീതി പരത്തുകയാണ്. തങ്കച്ചന്റെ വീട്ടുമുറ്റത്ത് എത്തിയ കുട്ടിയാന, ഭാര്യ ആനിയ്ക്ക് നേരെ പാഞ്ഞടുത്തു. ഇവർ ഓടി രക്ഷപ്പെടുന്നതിനിടെ വീണു പരുക്കേറ്റു. ശബ്ദം കേട്ടെത്തിയ തങ്കച്ചനെ ആന ചവിട്ടുകയായിരുന്നു.

പരിക്കേറ്റ ഇരുവരേയും ആശുപത്രിയിൽ പ്രവേശിപ്പിച്ചു. സംഭവം അറിഞ്ഞ് കരിങ്ങാട് എത്തിയ ഫോറസ്റ്റ് ഉദ്യോഗസ്ഥരെ നാട്ടുകാർ തടഞ്ഞു. കൂട്ടം തെറ്റി എത്തിയ ആനയെ പിടികൂടി ആന വളർത്ത് കേന്ദ്രത്തിലേക്ക് മാറ്റണമെന്നാണ് നാട്ടുകാരുടെ ആവശ്യം.