കുട്ടികളുടെ ആരോഗ്യം;ഫെബ്രുവരി 10 , ദേശീയ വിരവിമുക്ത ദിനം

കുട്ടികളിലെ വിളര്‍ച്ച തടയുന്നതിനും 

അവരുടെ ശാരീരിക, മാനസിക വളര്‍ച്ച ഉറപ്പുവരുത്തുന്നതിനുമായി ഇന്ത്യയിലുടനീളം ആചരിക്കുന്ന സുപ്രധാന ദിനമാണ് ഫെബ്രുവരി 10, ദേശീയ വിരവിമുക്ത ദിനം. 1 മുതല്‍ 19 വയസ്സുവരെയുള്ള കുട്ടികളിലും കൗമാരക്കാരിലും കണ്ടുവരുന്ന കുടലിലെ വിരബാധ തടയുക എന്നതാണ് ഈ ദിനാചരണത്തിന്റെ പ്രധാന ലക്ഷ്യം.

എന്തുകൊണ്ട് വിര വിമുക്തമാക്കണം?

മണ്ണില്‍ കളിക്കുന്നതിലൂടെയും ശുചിത്വമില്ലാത്ത സാഹചര്യങ്ങളിലൂടെയുമാണ് വിരകള്‍ കുട്ടികളുടെ ശരീരത്തില്‍ പ്രവേശിക്കുന്നത്. ഇവ കുട്ടികള്‍ കഴിക്കുന്ന ഭക്ഷണത്തിലെ പോഷകാംശങ്ങള്‍ വലിച്ചെടുക്കുകയും താഴെ പറയുന്ന ആരോഗ്യപ്രശ്‌നങ്ങള്‍ക്ക് കാരണമാവുകയും ചെയ്യുന്നു.

വിളര്‍ച്ച (Anemia)- രക്തക്കുറവ് മൂലം കുട്ടികള്‍ വേഗത്തില്‍ തളരുന്നു.

പോഷകാഹാരക്കുറവ്- വിരകള്‍ പോഷകങ്ങള്‍ കവരുന്നതിനാല്‍ ശരീരഭാരം കുറയുകയും വളര്‍ച്ച മുരടിക്കുകയും ചെയ്യുന്നു.

ഏകാഗ്രത കുറവ്: പഠനത്തിലും മറ്റ് പ്രവൃത്തികളിലും കുട്ടികള്‍ക്ക് ശ്രദ്ധ കേന്ദ്രീകരിക്കാന്‍ കഴിയാതെ വരുന്നു.

ആല്‍ബന്‍ഡസോള്‍: ലളിതമായ പരിഹാരം

ദേശീയ വിരവിമുക്ത ദിനത്തില്‍ ആല്‍ബന്‍ഡസോള്‍ എന്ന ഗുളികയാണ് സൗജന്യമായി വിതരണം ചെയ്യുന്നത്. ലോകാരോഗ്യ സംഘടനയുടെ അംഗീകാരമുള്ളതും തികച്ചും സുരക്ഷിതവുമായ മരുന്നാണിത്.

1 മുതല്‍ 2 വയസ്സുവരെ: 200 മില്ലിഗ്രാം (അര ഗുളിക) തിളപ്പിച്ചാറിയ വെള്ളത്തില്‍ അലിയിച്ച് നല്‍കണം.

2 മുതല്‍ 19 വയസ്സുവരെ: 400 മില്ലിഗ്രാം (ഒരു ഗുളിക) ചവച്ചരച്ച് കഴിക്കണം.

പ്രത്യേകം ശ്രദ്ധിക്കുക

വെറും വയറ്റില്‍ നല്‍കരുത്- ആഹാരത്തിന് ശേഷം മാത്രം ഗുളിക കഴിക്കുക.

ചവച്ചരച്ച് കഴിക്കുക- ഗുളിക പൂര്‍ണമായി ചവച്ചരച്ച് കഴിക്കുന്നത് കൂടുതല്‍ ഗുണം ചെയ്യും.

രോഗമുള്ളവര്‍ക്ക് വേണ്ട- പനിയോ മറ്റ് ഗുരുതര രോഗങ്ങളോ ഉള്ള കുട്ടികള്‍ക്ക് രോഗം മാറിയ ശേഷം മാത്രം ഗുളിക നല്‍കുക.

മൊപ്പിങ് അപ്പ് ഡേ- ഫെബ്രുവരി 10ന് ഗുളിക കഴിക്കാന്‍ സാധിക്കാത്തവര്‍ക്കായി ഫെബ്രുവരി 17ന് പ്രത്യേക വിതരണം ഉണ്ടാകും.

മുന്‍കരുതലുകള്‍

ഗുളിക കഴിക്കുന്നതിനോടൊപ്പം വ്യക്തിശുചിത്വം പാലിക്കുന്നതും പ്രധാനമാണ്

ഭക്ഷണം കഴിക്കുന്നതിന് മുന്‍പും ശൗചാലയം ഉപയോഗിച്ച ശേഷവും കൈകള്‍ സോപ്പിട്ട് കഴുകുക.

നഖങ്ങള്‍ വെട്ടി വൃത്തിയാക്കി സൂക്ഷിക്കുക.

തുറസ്സായ സ്ഥലങ്ങളില്‍ മലമൂത്രവിസര്‍ജ്ജനം നടത്താതിരിക്കുക.

തിളപ്പിച്ചാറിയ വെള്ളം മാത്രം കുടിക്കുക.

ആരോഗ്യമുള്ള ഒരു തലമുറയെ വളര്‍ത്തിയെടുക്കാന്‍ നമുക്ക് ഓരോരുത്തര്‍ക്കും കൈകോര്‍ക്കാം. നിങ്ങളുടെ കുട്ടി ഇന്ന് ഗുളിക കഴിച്ചുവെന്ന് ഉറപ്പുവരുത്തുക.