വയനാട് ടൗണ്ഷിപ്പ് ഉദ്ഘാടനം ഇന്ന്, 178 കുടുംബങ്ങള്ക്ക് മുഖ്യമന്ത്രി വീട് കൈമാറും
കല്പ്പറ്റ: വയനാട് ഉരുള്പൊട്ടല് ദുരിത ബാധിതരുടെ പുനരധിവാസത്തിനായി കല്പ്പറ്റ എല്സ്റ്റണ് എസ്റ്റേറ്റില് സര്ക്കാര് ഒരുക്കിയ മാതൃക ടൗണ്ഷിപ്പിന്റെ ഒന്നാം ഘട്ട ഉദ്ഘാടനം ഇന്ന്. മുഖ്യമന്ത്രി പിണറായി വിജയന് രാവിലെ 11ന് ഉദ്ഘാടനം നിര്വഹിക്കും.
ഗുണഭോക്താക്കള്ക്ക് മുഖ്യമന്ത്രി പട്ടയം കൈമാറും. ചടങ്ങില് മന്ത്രി കെ. രാജന് അധ്യക്ഷത വഹിക്കും. ഒന്നാംഘട്ട പട്ടികയിലെ 178 കുടുംബങ്ങള്ക്ക് വീട് കൈമാറും. ആയിരം ചതുരശ്രയടിയാണ് വിസ്തീര്ണം. ഏഴ് സെന്റിന്റെ പട്ടയം നല്കും. നിര്മാണം തുടങ്ങി 320ാം ദിനമാണ് ആദ്യഘട്ടം പൂര്ത്തിയായത്.
ദുരന്തത്തില് പൂര്ണമായും വീട് നഷ്ടമായ കുടുംബങ്ങള്ക്കാണ് ആദ്യ ഘട്ടത്തില് വീടുകള് നല്കുന്നത്. വയനാടിന്റെ ഭൂപ്രകൃതിക്കും കാലാവസ്ഥയ്ക്കും അനുയോജ്യമായ രീതിയില് വിവിധ സര്ക്കാര് സംവിധാനങ്ങളുടെയും ഏജന്സികളുടെയും തൊഴിലാളികളുടെയും ഏകോപിതമായ പ്രവര്ത്തനത്തിലൂടെയാണ് ടൗണ്ഷിപ്പ് യാഥാര്ഥ്യമാകുന്നത്.
ആകെ 410 വീടുകളും അനുബന്ധ സൗകര്യങ്ങളും വിഭാവനം ചെയ്തിട്ടുള്ള ടൗണ്ഷിപ്പിന്റെ ഒന്നാംഘട്ടത്തില് 178 വീടുകളാണ് പൂര്ത്തിയായത്. പ്രകൃതി ദുരന്തങ്ങള് അതിജീവിക്കാന് സാധിക്കും വിധം 1000 ചതുരശ്രയടിയില് ഒറ്റ നിലയില് പണിത കെട്ടിടങ്ങള് ഭാവിയില് ഇരു നില നിര്മ്മിക്കാനുള്ള അടിത്തറയോടെയാണ് തയ്യാറാക്കിയിരിക്കുന്നത്.
പ്രധാന കിടപ്പുമുറി, രണ്ട് മുറികള്, സിറ്റൗട്ട്, ലിവിങ്, സ്റ്റഡി റൂം, ഡൈനിങ്, അടുക്കള, സ്റ്റോര് ഏരിയ എന്നിവ വീടിന്റെ ഭാഗമായി ഉള്പ്പെടുത്തിയിട്ടുണ്ട്.
ഒരു അഭിപ്രായം പോസ്റ്റ് ചെയ്യൂ
0 അഭിപ്രായങ്ങള്