ആ നായ്കുട്ടിയുടെ ഓട്ടം അവർക്കിടയിൽ പ്രണയം വിരിയിച്ചു; കോവളം തീരത്ത് മകനെ സാക്ഷിയാക്കി ഒന്നായി!

മിരാൻഡയും അരുൺ ചന്ദ്രനും താലികെട്ടിനു ശേഷം കുഞ്ഞുമായി

കോവളം • ലോക്ഡൗൺ പ്രതിസന്ധിയ്ക്കിടെ കോവളം തീരത്ത് മൊട്ടിട്ടു പൂത്തുലഞ്ഞ പ്രണയവല്ലരിക്കു താലികെട്ടിലൂടെ സാഫല്യം. ഒരു വർഷം മുൻപ് പ്രണയത്തിലായ ഇംഗ്ലണ്ടുകാരി മിരാൻഡയും (മിമി) കോവളം സ്വദേശി അരുൺ ചന്ദ്രനും (കണ്ണപ്പൻ) ആണ് ഇന്നലെ കോവളം ആവാടുതുറ (കീഴേവീട്) ദേവീക്ഷേത്രത്തിൽ താലി ചാർത്തി പുതുജീവിതം ആരംഭിച്ചത്. ചടങ്ങിന് സാക്ഷിയായി മകൻ മൂന്നര മാസം പ്രായമുള്ള സായി ഉൾപ്പെടെ കണ്ണപ്പന്റെ ബന്ധുക്കളും മിമിയുടെ സുഹൃത്തുക്കളും. കോവിഡ് കാല ദൂരിതത്തിനിടയിലും ഇരുവരുടെയും പ്രണയവും കടിഞ്ഞൂൽ കനിയുമായുള്ള ഇവരുടെ പരിലാളനകളും കോവളം തീരവാസികൾക്ക് സന്തോഷ കാഴ്ചയായിരുന്നു.

ലണ്ടനിൽ സ്വകാര്യ സംരംഭകയായ മിരാൻഡ 2020 മാർച്ചിലാണ് ആദ്യമായി കോവളത്ത് എത്തുന്നത്. വൈകാതെ ലോക്ഡൗണിൽ നാടും നഗരവും സ്തംഭിച്ചു. ഇതോടെ മടക്കയാത്ര മുടങ്ങി. താമസിച്ചിരുന്ന വീട്ടിൽ മിരാൻഡ ഓമനിച്ചു വളർത്തിയ നായ്ക്കുട്ടി ഒരു ദിവസം പുറത്തേക്ക് ഓടിയതും സമീപവാസിയായ അരുൺ ചന്ദ്രൻ നായയെ പിടികൂടി തിരികെ ഏൽപ്പിച്ചതും ആ സന്തോഷത്തിൽ മിരാൻഡ ഒരു കപ്പ് കാപ്പിക്കു ക്ഷണിച്ചതുമാണ് ഇരുവരുടെയും ജീവിതത്തിൽ വഴിത്തിരിവായത്.

പരിചയം പിന്നീട് പ്രണയമായി. അവർ ഒന്നിച്ചു ജീവിക്കാൻ തീരുമാനിച്ചു. ഇതിനിടെ സായി എന്ന ആൺകുട്ടിയും പിറന്നു. സായി ആർതർ ലിറ്റിൽ ഫുഡ് എന്നാണ് മുഴുവൻ പേര്. കൊറോണ വ്യാപനം കുറഞ്ഞ് ലോകം സാധാരണ നിലയിലേക്ക് എത്തുമ്പോൾ നാട്ടിലേക്ക് തിരികെ പോകാനാണ് ഇവരുടെ തീരുമാനം .

കടപ്പാട് :മനോരമ ഓൺലൈൻ