താമരശ്ശേരി ചെമ്പ്രയില്‍ പാറക്കെട്ടില്‍ കുടുങ്ങിയ യുവാവിനെ രക്ഷപ്പെടുത്തി

താമരശ്ശേരി: ചെമ്പ്രയില്‍ പാറക്കെട്ടില്‍ കുടുങ്ങിയ യുവാവിനെ ഫയര്‍ഫോഴ്സും നാട്ടുകാരും ചേര്‍ന്ന് രക്ഷപ്പെടുത്തി. ചെമ്പ്ര സ്വദേശി വിജീഷാണ് ക്വാറിയിലെ പാറകള്‍ക്കിടയില്‍ കുടങ്ങിയത്. വ്യാഴാഴ്ച രാത്രിയാണ് ഇയാള്‍ ക്വാറിയില്‍ എത്തിയത്. രാത്രി മുഴുവന്‍ പാറക്കെട്ടിനുള്ളില്‍ കുടുങ്ങി കിടന്നു. വെള്ളിയാഴ്ച ഉച്ചയോടെ കരച്ചില്‍ കേട്ട് നാട്ടുകാര്‍ തിരച്ചില്‍ നടത്തിയപ്പോഴാണ് രണ്ടുകാലുകള്‍ മാത്രം പുറത്തേക്ക് കാണുന്ന രീതിയില്‍ പാറക്കൂട്ടങ്ങള്‍ക്കിടയില്‍ വിജീഷിനെ കണ്ടെത്തിയത്. 

തുടര്‍ന്ന് പോലീസിനെയും ഫയര്‍ ഫോഴ്സിനെയും വിവരം അറിയിക്കുകയായിരുന്നു. നരിക്കുനിയില്‍ നിന്ന് സ്റ്റേഷന്‍ ഓഫീസര്‍ ജയപ്രകാശിന്റെ നേതൃത്വത്തില്‍ ഫയര്‍ ഫോഴ്സ് എത്തി നാട്ടുകാരുടെ സഹായത്തോടെയാണ് വിജീഷിനെ പുറത്തെത്തിച്ചത്.

 ഏതാനും പാറക്കല്ലുകള്‍ നീക്കം ചെയത് ശേഷം മറ്റു കല്ലുകള്‍ കയറിട്ട് ബന്ധിപ്പിച്ച് സാഹസികമായാണ് ഇയാളെ പുറത്തെത്തിച്ചത്. അവശനായ വിജീഷിനെ താമരശ്ശേരി താലൂക്ക് ആശുപത്രിയില്‍ പ്രവേശിപ്പിച്ചു.