മദ്യലഹരിയിൽ മകൻ വീടിന് തീയിട്ടു, അച്ഛനും അമ്മയും ഓടിരക്ഷപ്പെട്ടു

കലവൂർ: മകൻ വീടിനു തീയിട്ടതിനെത്തുടർന്ന് അച്ഛനുമമ്മയും പ്രാണരക്ഷാർഥം ഓടിരക്ഷപ്പെട്ടു. പാതിരപ്പള്ളി സംസ്കാരികനിലയം വായനശാലയ്ക്കുസമീപം പാലച്ചിറയിൽ ഷാജിയുടെ വീടിനാണു തീപ്പിടിത്തമുണ്ടായത്. ഷാജിയുടെ മകൻ സഞ്ജു (26) മദ്യലഹരിയിൽ തീയിട്ടതാണെന്നു പോലീസ് പറഞ്ഞു.

തിങ്കളാഴ്ച രാത്രി 11.10-ഓടെയായിരുന്നു സംഭവം. മദ്യലഹരിയിലെത്തിയ സഞ്ജു തുണിയുപയോഗിച്ച് തീയിടുകയായിരുന്നുവെന്നു ഷാജി പറഞ്ഞു. തീ ആളിപ്പടരുന്നതു കണ്ട ഷാജി ഭാര്യയെയുംകൂട്ടി പുറത്തേക്കോടി. വീടിനകം പൂർണമായും കത്തിനശിച്ചു.

അയൽവാസികളും ആലപ്പുഴയിൽനിന്നെത്തിയ അഗ്നിരക്ഷാസേനയും ചേർന്നാണു തീയണച്ചത്. ഇവരുടെ സമയോചിതമായ ഇടപെടലിലൂടെയാണു തീ മറ്റിടങ്ങളിലേക്കു പടരാതെ നിയന്ത്രണവിധേയമാക്കാൻ കഴിഞ്ഞത്.