ഗുണ്ടൽപേട്ടിൽ പൂക്കാലം വന്നെത്തി; സൂര്യകാന്തിപ്പൂക്കൾ വിടർന്നു തുടങ്ങി

മണ്ണിലും മനസ്സിലും പൂക്കളുടെ പൊൻവസന്തമൊരുക്കിക്കഴിഞ്ഞു ഇത്തവണയും വയനാടൻ അതിർത്തി ഗ്രാമമായ ഗുണ്ടൽപേട്ട. മ‍ഞ്ഞയും ഓറഞ്ചും വയലറ്റുമൊക്കെയായി നിറങ്ങൾ കൊണ്ട് കളങ്ങൾ തീർത്ത പാടങ്ങൾ കണ്ണെത്താ ദൂരത്തോളം കാഴ്ചയുടെ ഉത്സവലഹരിയാണൊരുക്കുന്നത്.  ചെണ്ടുമല്ലി തന്നെയാണ് ഇത്തവണയും പൂപ്പാടങ്ങളിലെ താരം. മഞ്ഞ, ഓറഞ്ച് നിറങ്ങളിൽ നൂറു കണക്കിന് ഏക്കർ സ്ഥലത്താണ് ചെണ്ടുമല്ലി പൂത്തു നിൽക്കുന്നത്. ഒപ്പം സൂര്യകാന്തിയും ജമന്തിയുമൊക്കെയുണ്ട്.

ദേശീയപാത 766 ൽ വയനാട് അതിർത്തി കഴിഞ്ഞ് 16 കിലോമീറ്റർ ബന്ദിപ്പൂർ വനമേഖലയും പിന്നിട്ടാൽ മദൂർ മുതൽ പൂക്കൾ വിരിഞ്ഞു നിറ‍ഞ്ഞ കൃഷിയിടങ്ങളായി. വീണ്ടും 18 കിലോമീറ്ററോളം ഗുണ്ടൽപേട്ട വരെ റോഡിനിരുവശവും വിളവെടുപ്പിന് പാകമായ പൂന്തോട്ടങ്ങൾ കാണാം. കക്കൽ തൊണ്ടി, ഭീമൻപേട് എന്നിവിടങ്ങളിൽ നിന്നൊക്കെ ഗുണ്ടൽപേട്ടിലെ ഉൾഗ്രാമങ്ങളിലേക്കുള്ള വഴികളുടെ ഇരുവശവും പൂക്കളുടെ നിറക്കാഴ്ച തന്നെയാണുള്ളത്.

ദേശീയപാതയോരത്ത് പലയിടത്തും പൂപ്പാടങ്ങളിലേക്ക് സഞ്ചാരികളെ ക്ഷണിച്ചു കൊണ്ടു നിൽക്കുന്ന കർണാടകയിലെ സാധാരണ കർഷകരെയും ഇത്തവണ കണ്ടു. പൂക്കൾക്കിടയിൽ നിന്ന് ചിത്രം പകർത്തണമെങ്കിൽ ഒരു കുടുംബത്തിന് കുറഞ്ഞത് 50 രൂപ നൽകണമെന്ന് മാത്രം. മദൂർ മേഖലയിലാണ് പണം വാങ്ങി പൂപ്പാടത്തേയ്ക്ക് കടത്തി വിടുന്നത് കണ്ടത്. എന്നാൽ ഗുണ്ടൽപേട്ടിലെ ഉൾപ്രദേശങ്ങളിലേക്കുള്ള പൂപ്പാടങ്ങളിൽ ഇത്തരത്തിൽ പണം വാങ്ങുന്ന ഏർപ്പാടില്ല